پاکستان ، بھارت، افغانستان ، ازبکستان، تاجیکستان  ، ترکمانستان اور بحیرہ قزوین کے جنوب مشرقی ساحلی علاقوں کی  تاریخ کا ایک اہم  سوال  ابھی تک حل طلب ہے۔ سوال یہ ہےکہ ان  جغرافیائی   حدود میں  قدیم زمانے میں آباد یونانی  جو باختر سے  اور بعد ازاں  ہندوس(وادیٔ سندھ )سے مختلف اوقات میں مختلف علاقوں پر حکومت کرتے رہے، مغرب اور اپنے آبائی وطنوں یعنی یونان اور بحیرۂ اسود کی یونانی   نوآبادیوں سے کس قسم کے ثقافتی، تجارتی اور مذہبی تعلقات استوار رکھے ہوئے تھے؟ ماضی میں اس سوال کی طرف زیادہ توجہ نہیں  کی گئی۔ یہ فرض کرلیا گیا کہ پارتھیا کے یونانی سلیوکیوں سے آزادی  حاصل کرنے اور باختر کی یونانی سلطنت  سے اس کے بحیرہ قزوین کے ساحلی  علاقے چھیننے کے بعد یہ مشرقی یونانی باقی یونانی دنیاسے کٹ کر رہ گئے اور ان کی آئندہ نسلوں کا باقی یونانی  دنیا سے کوئی رابطہ باقی نہ رہا۔ یہ بات اتنی سادہ نہیں جتنی بادیٔ النظر میں دکھائی دیتی ہےاور اس کا جائزہ ممکنہ حد تک گہرائی کے ساتھ لینے کی ضرورت ہے ۔ کیا جب پارتھیا کی غیر یونانی سلطنت  بحیرہ اسود اوربحیرہ روم کے سواحل، میسوپتامیہ، شام و فلسطین،  اناطولیہ ،مصر، مشرقی یورپ اور یونان خاص کی یونانی آبادیوں اور باختر وہندوس کے یونانیوں کے درمیان حائل ہوگئی۔ اور کیا جب بحیرہ ٔقزوین سے متصل باختری یونانی علاقے پارتھیا نے باختر کی سلطنت  سے چھین لئے تو کیا ان  مشرقی یونانیوں تک’’ یونانیت‘‘   اور مغربیت کی  ہمہ جہت ترسیل  چاہے وہ مادی ہو یا غیرمادی، رک گئی؟ یہ ایک اہم سوال ہے جس کا جواب اس مضمون میں کسی حد تک تلاش کرنے کی کوشش کی جائے گی۔